【寫客文】北埔个姜阿新西洋樓房

文/黃筱婷 國小教師、竹東人、戴竹東

腔頭:海陸腔

前駁仔有一齣一開始做就受著大家歡迎个影戲「茶金」,影片主角係𠊎兜北埔客家莊个姜阿新伯公,佢係永光茶米公司个大頭家;姜阿新當有商業頭腦,該當時把握當多个茶米事業,還長透摎外國个人交關,將茶米賣到其他國家,逐擺都賺著當多个錢。

姜阿新樓屋个一樓。黃筱婷提供

為著茶米事業个利便,姜阿新特別委託竹東盡有名聲个彭玉里建築師傅,設計裝潢一間已派頭个西洋樓房;頭擺莊下罕得有人起樓房,大自家都係戴矮屋仔較多,姜阿新西洋樓房做得講係全北埔等靚个屋仔,今這下這棟樓房既經分新竹縣政府列做古蹟了。

姜阿新个洋樓有兩棧樓恁高。黃筱婷提供

該日天時當好,𠊎去到北埔客莊尞,從街路行到姜阿新个西洋樓房,單淨需要五分鐘个時間;樓房个庭院肚有一搭青里里个草坪,兩棧樓恁高个西洋樓房當得人惜。

廳下个大字係姜阿新寫个。黃筱婷提供

姜阿新樓屋个一樓係灶下摎姜阿新接待人客个廳下,這兩隻位所係用玻璃隔開來,當特別个係下頭設計砂玻璃,自家人毋會吵到人客;廳下頂背个大字係姜阿新寫个,大字底下係當少見个西洋壁爐,實在當特別个設計。

西洋樓房个棚頂係姜阿新个房間。黃筱婷提供

西洋樓房裡肚還有兩位樓梯做得跋到棚頂,姜屋人行樹仔个樓梯,人客行泰魯个樓梯;棚頂還過有姜阿新个房間,裡背有頭擺个眠床、桌仔、交椅這兜,滿哪仔都有久遠个歷史意義。

西洋樓房裡肚還有兩位樓梯做得跋到棚頂,人客行泰魯个樓梯。黃筱婷提供

姜阿新个西洋樓房係北埔街路一棟當派頭个屋仔,這个屋仔做得講係北埔茶米事業當要緊个事業沿革;西洋樓房肚項个各種文物保存當好,看得出姜阿新佢个家境豐湧;大自家有閒來北埔尞个時節,做得來這位了解姜阿新个創業傳奇故事,還做得參觀恁亮線个西洋樓房。

 

華語:

《北埔的姜阿新洋樓》

前陣子有一齣一開播就為著受到大家歡迎的戲劇「茶金」,影片中的主角就是我們北埔客家莊的姜阿新老先生,他是永光茶葉公司的大老闆;姜阿新非常有商業頭腦,在當時把持許多的茶產業,還經常和外國人交流,將茶葉販售到國外,每次都賺了許多錢。

為了方便拓展茶葉產業,姜阿新特別委託竹東很有名的彭玉里建築師,設計裝潢一棟漂亮的洋樓;以前鄉下相當難得看到有人蓋樓房,大家多是住在平房,姜阿新洋樓可以說北埔鄉最漂亮的一間房屋,現在這棟洋樓已經被新竹縣政府列為古蹟了。

在晴朗的一天,我來到北埔客庄遊玩,從街道走到姜阿新洋樓,只需要五分鐘的時間;庭院內有一大片綠油油的草地,兩層樓高的西式樓房十分討人喜歡。

一樓是廚房和姜阿新接待客人的大廳,這兩個地方是用玻璃窗作為隔間,最特別的是下方為霧面的毛玻璃設計,家人和客人不會互相干擾;大廳牆上所懸掛的書法為姜阿新親自書寫,書法下方是非常少見的西洋壁爐,實在是很特別的設計。

洋樓內還有兩處樓梯可通往二樓,姜家人走的是木板樓梯,外國賓客走的是磁磚樓梯;二樓還有姜阿新的臥室,臥室內有古早的眠床、桌子、椅子,每一處物品都充滿久遠的歷史。

姜阿新洋樓是北埔老街上一幢相當氣派的建築物,它可以說是北埔茶葉相當重要的產業沿革;洋樓內的各項文物維持完好,看得出當時姜阿新的家大業大;大家有空來北埔遊玩時,可以來這裡瞭解姜阿新的創業傳奇,還可以參觀華麗的洋樓。

這篇文章 【寫客文】北埔个姜阿新西洋樓房 最早出現於 客新聞 HakkaNews