【寫客文】無共樣个竹筍期

文/彭賢祥 桃園市客語薪傳師、苗栗大湖人、這下戴桃園大溪

腔頭:四縣腔

今年天時摎逐年無共樣哦!年過忒就落雨落到毋會停,雖然對亻厓兜來講,造成日常生活个無方便,毋過對這客家莊个桂竹筍,係盡好个肥料,跈等桂竹筍就會浡出地泥項,毋係幾支定定哦!係歸片个雨後春筍个畫面,連腳愛踏个位所就無,所以一定會搣到無閒洎杈,正經係無共樣个竹筍期。

想起阿爸帶亻厓去拗竹筍个情形,臨天光仔就分人喊䟘起來,目珠就還吂擘開來,就換衫褲、著水靴筒、戴帽仔、戴手落仔、背等家濟仔,腳一踏到竹園肚,看著滿坪塞塞,烏䁯烏䁯个竹筍,全部到腳膝頭恁高、當堵好拗,心肝肚想今晡日會悿死哩!看著阿爸用手指公撳尾節對摺,左手扳等頭節、右手跈等就摎竹殼項拉出一條溝仔,續等兩隻手指公順等溝仔摎竹殼綻下來,阿爸个手腳當遽,一條條緊拂到家濟仔肚項,續等阿爸又緊行緊剝,無幾久就歸家濟仔淰淰哩。

竹筍期同時乜係油桐花開花个時節,竹園肚項抑係園脣,輒常會生幾頭高大个油桐樹,所以竹園肚个地泥項,會有一褡係白色个地毯,行到白色个地毯項,心情係當暢快个,試著拗竹筍係當生趣又好搞个頭路,竹園肚生態異好,有跏跏糾糾个蛇哥,看著就愛遽遽瀉走!還有會食竹筍个筍蛄仔,圓身像熟熟个柿仔色當靚,現下當少看得著哩!還有在耳公脣,飛來飛去緊噭,搭毋著又盡得人惱个蚊仔,有成時仔,佢會停在手梗項,肚屎食到紅紅飽𩜰𩜰bid bid仔,亻厓用手巴掌大力搭下去,毋過手梗兩下半起胮當癢,緊爪緊講:「這隻該死个蚊仔!」

老古人言:「竹愛嫩時拗,子愛幼時教。」竹筍愛嫩嫩時節拗,在拗竹筍該央時,看著竹筍在石縫項必出來,竹筍圓身係扁扁个,乜有竹尾𠖄等竹笐,竹筍圓身係彎彎个,用竹筍來看亻恩个人生,人在細个時節,愛用心好好仔教,在正常个環境下成長,毋好等大了該下,正來拗直,正來撚畀圓來,到時就來毋掣哩!這就係無共樣个筍期體會出來个道理,像桂竹共樣,愛摎石頭搬走、竹笐擎開,恁樣个環境下,正會生出又直又圓个竹筍。

 

華語:

不一樣的竹筍期

今年天氣跟往年不一樣哦!年過完就下雨下到不會停,雖然對我們來講,造成日常生活的不方便,不過對這客家莊的桂竹筍,是最好的肥料,跟著桂竹筍就會冒出地上,不是幾支而已哦!是一整片的雨後春筍的畫面,連腳要踏的位置就沒有,所以一定會弄到非常忙碌,真的是不一樣的竹筍期。

想起爸爸帶我去採竹筍的情形,黎明的時候就被人叫起床了,眼睛還沒睜開來,就要換衣服、穿雨鞋、戴帽子、戴手套、背著家濟袋,腳一踩到竹園裏,看到整片塞滿滿,暗黑暗黑色的竹筍,全部都到膝蓋的高度,最剛好採,心裏想著,今天肯定會累死了!眼看爸爸用姆指按住筍尾對摺,左手搬著筍頭,右手跟著就將竹殼拉出一條溝來,接著兩隻姆指順著溝將竹殼剝下來,爸爸的手腳很快,一條條丟到家濟袋裏面,接著爸爸又邊走邊剝殼,沒多久整個家濟袋就滿滿的。

竹筍期同時也是油桐花開花的時候,竹園裏面或是竹園邊界,常常會長幾棵高大的油桐樹,所以竹園裏的地上,會有一塊是白色的地毯,走到白色的地毯裏,心情是很快樂的,覺得採竹筍是很有趣又好玩的工作,竹園裏的生態很好,有彎彎曲曲捲著的蛇,看到就要趕快跑走!還有會吃竹筍的筍蛄,身體像熟熟的柿子色很漂亮,現在很少看得到了!還有在耳邊,飛來飛去一直叫,要打又打不到討厭的蚊子,有時候會停在手臂上,肚子吃到紅紅飽飽的,我用手掌大力的打下去,不過手臂很快就腫起來很癢,邊爪邊講:「這隻該死的蚊子!」

俗語說:「竹要嫩時採,子要幼時教。」竹筍要嫩嫩的時候採,在採竹筍的那時,看到竹筍在石縫中鑽出來,竹筍的身體是扁扁的,也有筍尾頂著竹筒,竹筍身體是彎彎的,用竹筍來看我的人生,人在小的時候要用心好好教,在正常的環境下成長,不要等到大的那個時候再來弄直、再來捏圓,到那個時候就來不及了!這就是不一樣的竹筍期體會出來的道理,像桂竹一樣,要把石頭搬走、竹筒拿開,這樣的環境下才會長出又直又圓的竹筍。

這篇文章 【寫客文】無共樣个竹筍期 最早出現於 客新聞 HakkaNews