土耳其強震/震後79小時再現奇蹟！　2男女童獲救、台灣搜救隊再救出1女性

10 2 月, 2023

土耳其強烈大地動過後79點鐘出現奇蹟！救出2歲細倈仔、16歲細妹仔

【蘇佑昇／西湖海陸腔】土耳其摎敘利亞交界个所在在2月初6發生規模7.8強烈大地動，台灣還有全世界各國个救援隊伍到現場救援之後，經過79點鐘過後，今晡日在南部城市安塔基亞市（Antakya）橫忒个大樓磚瓦下背過救出一儕2歲个2歲細倈仔還有16歲个細妹仔，一擺救出兩儕，分現場个救援團隊當振奮也當歡喜，感動到在現場大聲歡呼。

根據路透社報導，土耳其人權、自由摎人道救援基金會（IHH）个畫面顯示，救難人員從一隻當狹个空仔摎一儕在該噭眵个細倈仔救出來，續下來在第80點鐘，救難人員過在安塔基亞市（Antakya）救出16歲細妹仔艾塔斯（Melda Adtas），這儕細妹仔个阿爸也暢到噭出來，這隻連續救出兩儕細孲仔个消息，也分土耳其全國哀傷个時節，做得有信心支持下去。

接下來係台灣搜救隊過發現因為土耳其大地動矺在磚瓦下背个人了

台灣兩批去到土耳其大地動災區現場个搜救隊，在土耳其當地時間兩點37分，在磚瓦下背尋著一儕矺在磚瓦下背个人，佢還做得聽著搜救人員个聲音，生命徵象目前還係穩定个，這滿台灣搜救隊摎土耳其當地隊伍AKUT共下合作救援當中，另外，兩點55分醫療團隊也到現場𢯭手，根據台灣个內政部消防署表示，台灣搜救隊愛先打忒矺在受困者頭前个大柱楯，才做得救出來這儕受傷个人，假使有過較多个救援消息，<客新聞>、<講客電臺>會摎大家報導最新个消息。

（更新資訊台灣時間：下午1點00）台灣搜救隊成功救出1名37歲女性，生命跡象穩定並送醫當中。